Inuunerissaavik Steno Kalaallit Nunaat – qarasaasiakkut nakorsiartitsinermut peqqissaasumik

Inuunerissaavik Steno Kalaallit Nunaat – qarasaasiakkut nakorsiartitsinermut atatillugu suliniummi peqqissaasumik erninermut atatillugu sulinngiffeqartumut taartaasussamik sulisussarsiorpoq

Inuunerissaavik Steno Kalaallit Nunaat, erninermut atatillugu peqqissaasutut nuna tamakkerlugu immikkut ilisimasalittut akisussaaffilimmut, sulinngiffeqartumut taartaasussamik, diabetes-imut, KOL-imut aallu taqqanut naqitsinerata qaffasinneranut tunngasunik isumaginnissinnaasumik, kiisalu qarasaasiakkut nakorsiartitsinermut atatillugu suliniummik ingerlatseqataasinnaasumik pissarsiorpoq.

Nunatsinni Peqqinnissaqarfimmi suliniuteqarnermi nukittorsaaqataarusukkuit, suliffik una ilinnut naleqquppoq. Inuunerissaavik Steno Kalaallit Nunaat Peqqinnissaqarfik suleqatigalugu, peqqissaasumik nuna tamakkerlugu diabetesimut-, KOL-imut aallu taqqanut naqitsinera qaffasissumut tunngasunik suliaqartussamik, kiisalu qarasaasiakkut nakorsiartitsinernik ingerlatseqataalluni immikkut ilisimasalittut akisussaaffeqartussamik pissarsiorpoq.

Kalaallit Nunaanni innuttaasut 56.000-it missaat sinerissami siammarsimallutik najugaqarnerat, tikinniarnissaannut sumilu najugaqarneq apeqqutaatinnagu nakorsiartitsisinnaanissamut nakorsaasinnaanissamullu assigiimmik periarfissiinissamut neqeroorsinnaanermullu tunngatillugu unammilligassaqarpoq. Unammilligassaq taanna iliuuseqarfiginiarlugu nuna tamakkerlugu atuutilersussamik qarasaasiakkut nakorsiartitsinermut atatillugu suliniuteqartoqarpoq. Peqqissaasutut, Inuunerissaavik Steno Kalaallit Nunaanni nalinginnaasumik sulinermi peqataanerpit saniatigut, suleqatigiinnut nuna tamakkerlugu qarasaasiakkut nakorsiartitsinermut atatillugu suliniummik atuutilersitsisussanut ingerlatsillutillu ikorfartuisussanut ilaassaatit. Tamatumunnga atatillugu sinerissami qitiusumik immikkoortuni nakorsat peqqissaasullu peqatigalugit atuutilersitsiartuaarnermi nalimmassaanerit/inerisaaqqinnerit pisariaqartinneqarsinnaasut qulaajarniarlugit, ataqatigiissaarinerni naliliinernilu peqataassaatit.

Neqeroorutigaagut:

• Inuunerissaavik Steno Kalaallit Nunaat, Peqqinnissaqarfiup sinneranik qanimut suleqateqarluni atorfik pigaartuuffeqanngitsoq
• Atorfik pissanganartoq tamatigoortunik unammilligassalik sunniuteqarfigineqarsinnaasorlu.
• Inuttut ilinniagaqassutsikkullu ineriartornissamut periarfissalik. 
• Nuummi Inuunerissaavimmi Steno Kalaallit Nunaanni atorfik.
• Peqqinnissaqarfiup qitiusumik immikkoortuinik nuna tamakkerlugu suleqateqarneq, ilaatigut illoqarfinni nunaqarfinnilu pikkorissaaneq sanileralugillu ilinniartitsineq.
• Sullivimmi avatangiisit pitsaasut suleqatillu pitsaasut ikiuukkumatuullu.

Pissarsiarerusutarput:

• Peqqissaasutut ilinniarsimassaaq.
• Kalaallisut danskisullu oqaatsinik atuisinnaassaaq 
• Nunatsinni qarasaasiakkut nakorsiartitsinernik ingerlatsinissamut- taamaalillunilu kikkut tamarmik –sumi najugaqarneq apeqqutaatinnagu taamatulli pitsaatigalunilu qaffasitsigisumik nakorsarneqarsinnaalersitseqataanissamut kajumissuseqassaaq. 
• Qarasaasiakkut nakorsiartitsinerup suliniutitut atuutilersinneqarnissaata iluatsilluarnissaanik qulakkeereqataasinnaassaaq allannguinissarpassuillu iluatsissinnaanissaannut piumasaqaataasunik piukkunnarsaassaaq.
• Suleqatit periarfissanik nutaanik atuinissaannik ilinniartitsinissamut siunnersuinissamullu kajumissuseqassaaq
• Napparsimasunut suleqatinullu tunngatillugu ammasuussaaq, asissuijuitsuussaaq assigiinngissutsinullu inissaqartitsissalluni
• Pitsaasuussaaq, attaveqatigiinneq ataatsimullu isiginnissinnaaneq pikkoriffigissavai, ataatsimoorneq inussiarnersumillu oqaloqatigiinneq pingaartillugit.
• Sulinermut atatillugu Nuup avataanut angalanerni peqataasarsinnaassaaq

Uagut:

Inuunerissaavik Steno Kalaallit Nunaat 2020-imi juulip ulluisa aallaqqaataanni nunatsinni Peqqinnissaqarfiup ilaatut atulerpoq. Immikkoortoq aningaasaateqarfimmit Novo Nordisk Fondimit Namminersorlutillu Oqartussanit aningaasalersorneqarpoq. Nalinginnaasumik nuna tamakkerlugu inunnut tamanut diabetesimik nappaateqartunut inooriaatsimullu attuummassutilinnik nappaateqartunut- soorlu aap taqqanut naqitsinera qaffasissunut anigugassaanngitsumillu pualluutilinnut (KOL) peqqissutsimik inuunerullu naleqassusaanik pitsannguinissaq anguniakkatut takorluugaraarput. Nakorsaaneq nappaatilinnillu ilinniartitsineq, ilisimatusarneq, akimuilluni suleqatigiinneq, piginnaasanik inerisaaneq, qarasaasiakkut nakorsiartitsineq pitsaassuserlu qitiutinneqarput. Inuunerissaavik Steno Kalaallit Nunaanni qitiusumik sullissivimmi pisortat tassaapput nakorsatut pisortaq allaffissornikkullu ingerlatsinermi pisortaq. Suleqatigiillu tassaapput ilinniagaqassuseq akimorlugu allaffissornikkut ingerlatsinermut, peqqinnissamut ilisimatusarnermullu tunngasunik suliallit, taakkulu ukiuni tulliuttuni amerliartortussaassapput.

Sullissivik maannamuugallartoq Dronning Ingridip Napparsimmavissuani Peqqissaavianilu Nuumiittuni agguataarluni inissisimavoq. Inuunerissaavik Steno Kalaallit Nunaat qitiusumik sullissivissatut sanaartukkamut nutaamut Dronning Ingridip Napparsimmavissuata Peqqissaaviatalu eqqaaniittussamut 2024-imi nuussaaq.

Kalaallit Nunaanni Peqqinnissaqarfik– atitussuseq, unammilligassaq ilinniagaqassutsikkullu tulluusimaarneq

Kalaallit Nunaanni Peqqinnissaqarfik aaqqisuussaanikkut Peqqissutsimut Naalakkersuisoqarfiup ataani inissisimasoq, sinerissami tallimanik qitiusumik immikkoortortaqarpoq Napparsimmavissuarmilu sisamanik qitiusumik immikkoortortaqarluni, kigutileriveqarfeqarluni, Kalaallit Peqqissartut Illoqarlutik ingerlatsinermullu qitiusumik immikkoortortaqarluni.

Ilinniagaqassutsikkut imminut unammillerusuppit, alapernaatsuuit atituunillu suliaqarneq nuannaraajuk? taava Kalaallit Nunaanni Peqqinnissaqarfimmi atorfeqarnissaq ilinnut naleqquttuussaaq.

Kalaallit Nunaanni Peqqinnissaqarfik uani annertunerusunik paasisassarsiorfigisinnaavat: www.gjob.gl       

Kalaallit Nunaanni sunngiffimmi sammisaqarnissamut periarfissarpassuaqarpoq. Aasakkut asimi angalaarneq, arfersiorneq, piniarneq, aalisarneq angallammik angalaarneq sammisassaqqissuupput. Ukiumi arsarnerit, naammatilluni sisorarumagaanni qaasuitsullu killeqarfiata avannaaniikkuit qimussersinnaavutit. Illoqarfinni annerusuni kulturimut tunngasunik sammisassarpassuaqarpoq timersoqatigiiffeqarpoq, eqqumiitsulianik saqqummersitsisoqartarpoq, tusarnaartitsisoqartarpoq, kaffisorniartarfeqarpoq neriniartarfeqarlunilu. Nunap immikkoortua atorfiniffissat pillugu www.peqqik.gl-imi annertunerusunik paasisassarsiorsinnaavutit. 

Innuttaassuseq

Nunat Avannarliit arlaanni innuttaassuseqanngikkuit, atorsinnaasumik najugaqarnissamut sulinissamullu akuersissummik peqarnissavit atorfininnissamut piumasaqaataanera maluginiaqquneqarpoq. Atorfininnissamut isumaqatigiissuteqarnermi aatsaat najugaqarnissamut sulinissamullu akuersissummik qinnuteqartoqarsinnaavoq.

Akissarsiat atorfininnerlu

Akissarsiassani atorfininnermilu atugassarititaasuni, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut, Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorneqassapput.

Peqqissaasoq: Atorfininnissamut Kalaallit Nunaanni peqqissaasutut sulisinnaatitaanermut uppernarsaammik takutitsisinnaanissat piumasaqaataavoq (www.nun.gl aqqutigalugu qinnutigiuk)

Ineqarneq

Kalaallit Nunaanni Peqqinnissaqarfimmi maleruagassat atuuttut naapertorlugit inissamik innersuussisoqassaaq.

Qinnuteqaat

Qinnuteqaat uppernarsaatinik naapertuuttunik ilallugu PDF-inngorlugu www.Gjob.gl aqqutigalugu nassiunneqassaaq

Sulilerfissaq: 1. januar 2023 tamatumaluunniit kinguninngua- 31. december 2024-ip tungaanut.

Qinnuteqarfissaq kingulleq:

25. december 2023

Attavissaq:

Atorfik pillugu paasissutissat nakorsatut pisortamut Michael Lynge Pedersenimut oqarasuaatikkut: (+299) 34 44 43 imal. mailikkut: MILP@peqqik.gl /allaffimmi pisortamut Mads Nyhus Kirk-imut oqarasuaatikkut (+299 28 31 43) imal. mailikkut: mcnk@peqqik.gl  attaveqarnikkut pissarsiarineqarsinnaapput.

Akissarsiat atorfininnermilu atugassarititaasut pillugit paasissutissat nalinginnaasut mailikkut uunga saaffiginninnikkut: PERSONALE@PEQQIK.GL pissarsiarineqarsinnaapputtaaq.

Kalaallit Nunaanni Peqqinnissaqarfiup aaqqissuussaaneranut takussutissiaq uani takuuk:

Organisationsdiagram Det Grønlandske Sundhedsvæsen

Kalaallit Nunaanni Peqqinnissaqarfik suliffittut pujortarfiunngilaq.

Qinnuteqaatit PDF-inngorlugit allakkiat elektroniskimik Gjob.dk aqqutigalugu nassiussat kisiisa tigusinnaavagut.

Qinnuteqaatit mailikkut nassiussat ilinnut isumannaannerussammat ingerlaannaq peerneqassapput.

• Fakta

• Arbejdssted
  Grønlands Sundhedsvæsen
• Kontaktperson
  Personale Afdelingen
• Adresse
  Personaleadministrationen, 1230 Nuuk
• Stillingstyper
  Sygeplejerske
• Ansættelsesform
  Fast ansættelse
• Ugentlig arbejdstid
  Fuld tid
• Ansættelsens start
  01-01-2024
• Regionens jobnr.
  23-672
• Quick-nr.
  457337
• Indrykningsdato
  14-12-2023
• Ansøgningsfrist
  25-12-2023 (udløbet)